Magaresume na subong nga adlaw ang road clearing operations diri sa ciudad sang Bacolod, probinsya sang Negros Occidental kag bilog nga pungsod.
Ini ang santo sa Memorandum Circular No. 2020-2015 nga ginpagwa sang Department of the Interior and Local Government nga nagamandu sa mga gobernador, alkalde, punong barangay kag pinuno sang Sangguniang Panlungsod nga padayunon ang road clearing operation nga una na nga naumpisahan apang nauntat bangud sa coronavirus pandemic.
Tinalikdan nga adlaw, nagpangayo sang kooperasyon ang pinuno sang Department of the Interior and Local Government (DILG) Bacolod sa mga Punong Barangay kag Sangguniang Bayan nga hatagan sang prayoridad ang patigayunon nga road clearing operation sumugod Nobyembre 16, 2020 tubtob Enero 15, 2021 santo sa mando ni Presidente Rodrigo Duterte.
Sa interview sang Bombo Radyo kay DILG Bacolod City director Ma. Joy Marideth Madayag, nagahingyo ini sang kooperasyon sa mga opisyales sang barangay kag sangguniang bayan nga hatagan ini sang prayoridad bangud duha ka bulan ukon 60 ka adlaw lang ang ginhatag sang national government agud mavalidate ang resulta.
Suno kay Madayag, may yara sang reporting kada bulan kag validation naman pagka-Enero sa masunod nga tuig.
Suno diri, sa patigayunon nga validation, kinahanglan nga malab-ot sang tagsa ka LGU ang basis sang memorandum bangud ini ang ginakabig nga preparasyon sa pagbalik sa new normal.
Nagapati man ini nga indi na mabudlayan ang mga opisyales bangud una na ini nga nasugudan antes pa man ang COVID pandemic.
