Ginhatagan sang prayoridad sang mga opisyales sang barangay ang illegal parking sa una nga adlaw sang pagresume sang road clearing operations sa Bacolod City kag Negros Occidental kahapon.
Madumduman nga santo sa Memorandum Circular No. 2020-2015 nga ginpagwa sang Department of the Interior and Local Government, ginmanduan sini ang mga gobernador, alkalde, punong barangay kag pinuno sang Sangguniang Panlungsod nga padayunon ang road clearing operation nga una na nga naumpisahan apang nauntat bangud sa coronavirus pandemic sumugod Nobyembre 16, 2020 tubtob Enero 15, 2021 santo sa mando ni Presidente Rodrigo Duterte.
Sa interview sang Bombo Radyo kay ABC President Lady Gles Gonzales Pallen, ginpahayag sini nga maayo mana ang ila nga assessment sa una nga adlaw sang road clearing operations kag una nila nga ginfocusan amo ang illegal parking.
Suno kay Pallen, ila lang anay ginasaway kag ginhatagan sang warning ang mga nadakpan kahapon.
Suno diri, ila ginhatagan sang napulo ka adlaw ang mga ini agud magcomply ukon hawanan ang dalan bangud kun indi mahimo, ang barangay mismo ang mademolish sini.
Gindugang man sang konsehal nga ila gin-una ang mga indi gid maayo maapektuhan ang income, palangabuhian kag mga balay ilabi na nga nagahilapit ang Paskwa.
Nagapangayo man ini sang kooperasyon kag pag-intindi sang mga pumuluyo bangud nagasunod lang sila sa mando kag ila ini pagahimuon nga dala nga konsiderasyon kag kaluoy.
