Ginkumpirmar sang provincial administrator sang Negros Occidental nga nagpositibo sa coronavirus disease ang OIC budget officer sang probinsya.
Sa interview sang Bombo Radyo kay Atty. Rayfrando Diaz, ginpahayag sini nga boluntaryo nga nagpaswab ang pasyente bangud nagsuprer ini sang hilanat sang Miyerkules, Nobyembre 11, kag pagkahapon, nagwa ang resulta nga positibo ini sa virus.
Suno kay Diaz, gilayon nga nagpatigayon sang contact tracing kag ginswab ang pamilya kag mga kaupod sini sa opisina.
Suno diri, negatibo ang mga empleyado samtang nagpositibo naman ang iya brother-in-law.
Nakatambong man ini sa budget hearing sang Sangguniang Panlalawigan sang Miyerkules kag apisar nga nag-obserbar ini sang health protocols, ginpaidalum gihapon sa swab test ang mga nagpungko malapit sa iya kag gindisinfect ang session hall sang Sabado.
Suno sa provincial administrator, posible nga nagluntad ang transmission sa puluy-an sang budget officer bangud nagpatigayon ang pamilya sang pagpangamuyo para sa ila minatay kaupod ang lima ka mga professional prayer warriors, nga padayon pa nga ginapangita sang probinsya.
Suno kay Diaz, ginahulat pa ang resulta sang swab test sang pila ka mga nakaclose contact sang pasyente kag ginalauman nga magwa ini subong ukon bwas nga adlaw.
Sa karun, nakaquarantine ang budget officer kag brother-in-law sini sa Mambukal Mountain Resort.
