Nagapangatubang sang kaso nga murder ang isa ka suldado kag duha ka iban pa bangud sa pagpatay sa isa ka barangay kagawad sa ciudad sang Sagay nagligad nga Nobyembre 12.
Madumduman nga papauli na kuntani si Negro sa ila nga balay sakay sa iya nga tricycle sang hinali lang ini gintupungan sang motor-riding suspects kag ginluthang sang makapila ka bes nga gintunaan sang iya kamatayon.
Sa interview sang Bombo Radyo Bacolod kay P/Major Albert Sy, hepe sang Sagay City Police Station, ginpahayag sini nga samtang nagapatigayon sang pursuit operations ang kapulisan, ila nadakpan ang anay SCAA member nga si Marcial Maquimot nga nagresulta sa pagka-aresto nanday Army Cpl. Rico Fuertes, Special CAFGU member Rex Muchuela, kag Ellenel Boy Marquez.
Kahapon, ginpasaka na ang kaso nga murder batok sa tatlo sa Sagay City Prosecutor’s Office may kaangtanan sa kamatayon ni Barangay Kagawad Mario Negro sang Barangay Lopez Jaena, Sagay City samtang ginhilway naman si Maquimot bangud sa kakulang sang ebidensya nga may kahilabtanan ini sa krimen.
Santo sa imbestigasyon sang kapulisan, madugay na nga hiligut-anon sa tunga sang biktima kag ni Marquez ang motibo sa krimen.
Nalakip man ang biktima sa drug’s watchlist sang Sagay City Police Station.
Suno kay Sy, ginapahayag nga si Fuertes, assistant detachment commander sa banwa sang Moises Padilla ang gina-alegar nga gunman matapos nga magpositibo ini sa gunpowder nitrates bilang resulta sang paraffin tests.
Samtang, ginpasalig naman ni 3rd Infantry Division spokesperson Major Cenon Pancito III nga magabulig sila sa imbestigasyon sang kaso agud mahatagan sang hustisya ang kamatayon ni Negro.
Ginpasiguro man ni Pancito nga wala nila gina-konsinte ang kaangay nga insidente kun sa diin involved ang isa ka suldado.
Suno sa tagpamaba, naka-emergency leave si Fuertes halin Nobyembre 10 tubtob Nobyembre 30, 2020 bangud nga kinahanglan sini mag-atinder sa nagabusong niya nga asawa.
