Masobra 15 ka mga tapangko sa gwa sang talipapa sa Barangay Banago sa ciudad sang Bacolod ang ginpangkakas na kag ginsaylo sa isa ka pribado nga merkado sa amo gihapon nga barangay kadungan sa pagpadayon sang road clearing operation sang gobyerno.
Sa interview sang Bombo Radyo Bacolod sa vendor nga si Bongbong Abalos, pabor man ini sa pagpahalin kag paghawan sa atubang nga bahin sang talipapa.
Suno kay Abalos, wala naman kita sang may mahimo bangud nga mando ini sang gobyerno kag dapat nga magsunod nalang ang tanan.
Nahibaluan nga mga isda kag utanang kalabanan nga ginabaligya sa mga tapangko nga nagalaksam sa dalan.
Madumduman nga kahapon nagsugod na ang pagresume sang road clearing operation santo sa Memorandum Circular No. 2020-2015 nga ginpagwa sang Department of the Interior and Local Government nga nagamandu sa mga gobernador, alkalde, punong barangay kag pinuno sang Sangguniang Panlungsod nga padayunon ang road clearing operation nga una na nga naumpisahan apang nauntat bangud sa coronavirus pandemic.
Magalawig ini sang duha ka bulan ukon 60 ka adlaw kun sa diin natalana ini nga matapos sa Enero 15, 2021.
