Magapadala ang provincial government sang Negros Occidental sang P4 million nga cash assistance sa mga probinsya sang Albay, Catanduanes, Cagayan kag Isabela nga nahalitan kag naapektuhan sang pagbaha bangud sa pag-agi sang Typhoon Rolly kag Ulysses.
Ang nasambit nga assistance ang gin-aprubahan sa Provincial Disaster Risk Reduction and Management Council (PDRRMC) Meeting nga ginhiwat sa Capitol Social Hall kahapon kag ginpangunahan ni PDRRMC chairperson Gov. Bong Lacson.
Ang tagsa ka mga probinsya ang makabaton sang P1 million nagikan sa Negros Occidental sa koordinasyon sa ila mga tagsa-tagsa ka local government units.
Gin-aprubahan man ang P156,520,000 nga balor sang programa, proyekto kag mga aktibidad nga pondohan sa idalum sang 2021 PDRRM fund nga nagaprioritize sa necessary emergency preparedness kag response programs.
Ang gin-aprubahan nga mga agenda ang iga-endorso sa Sangguniang Panlalawigan.
