Nagsugod naman sa pagbulig sa road clearing operation ang Bacolod Traffic Authority Office (BTAO) kadungan sa pagresume sini sang nagligad nga Lunes, Nobyembre 16.
Sa interview sang Bombo Radyo Bacolod kay Lt. Col. Luisito Acebuche, pinuno sang BTAO, ginpahayag sini siyam ka mga area na ang ila nga na-clear santo sa request sang mga punong barangay nga nagapangayo sang assistance bilang isa ka supporting unit sa road clearing operation.
Suno kay Acebuche, nahawanan na nila ang San Juan St. kag Galo St. sa downtown area; Libertad, Amelia St., Lopez Jaena St. kag Hernaez St. sa south nga bahin; kag ang Cottage Road, Purok Sawmill kag Burgos St. naman sa north area.
Gin-athag man sini nga ang BTAO ang naka-assign sa mga movable area kaangay na lamang sang mga salakyan kag ambulant vendors samtang ang city legal office (CLO) naman ang sa mga immovable kaangay na lamang sa mga tapangko ukon mga illegal structures mismo.
Ginpasiguro naman ni Acebuche nga ginabutangan nila sang personnel ang area nga ila nahawanan na agud indi na magbalik pa ang mga pumuluyo.
Samtang, ginkumpirmar naman ni Bacolod City Police Office (BCPO) spokesperson P/Lt. Col. Ariel Pico, nga may yara man sang mga police personnel nga naga-assist sa CLO kag sa task force sang mga barangay angot sa road clearing operation.
Suno kay Pico, bisan wala sang resistance ukon violent reaction nagikan sa mga pumuluyo, dapat nga mag-upod gihapon ang mga pulis agud mapadasig ang pag-implementar sang programa.
Nagpasalig ang tagpamaba nga suportado sang BCPO ang amo nga programa sang gobyerno nga una na ginpatuman sang nagligad nga tuig apang gin-untat lang bangud sa coronavirus pandemic.
