Nagapatigayon sang mall campaign nga “BPLO On-The-Go” ang Business Permits and License Office (BPLO) sa ciudad sang Bacolod.
Sa interview sang Bombo Radyo Bacolod kay Stela Rose Rayos, pinuno sang BPLO, ginpahayag sini nga tinutuyo sang amo nga tikang nga mabuligan ang mga negosyante nga makapreparar na nga daan para sa pagproseso sang ila nga 2021 business permits.
Suno kay Rayos, bangud sa COVID-19 pandemic, indi nila luyag nga magdinaguso ang mga tawo sa pagkuha sang business permit gani nga subong pa lang luyag na nila nga magsugod proseso ang mga business owners.
Dugang pa sini nga maga-set up sang help desk ang ila nga personnel sa siyam ka mga mall sa ciudad sa ila nga scheduled dates agud nga magsabat sang mga queries angot sa business permits kag magahatag man sila sang application forms para sa 2021 business permits.
Apang suno kay Rayos, dapat anay nga magpakita sang photocopy sang ila nga 2020 business permit ang mga negosyante antes sila mahatagan sang application form.
Gin-athag man sini nga sa Enero, 2020 pa ang assessment kag ang pagbayad sang mga business owners.
Nahibaluan nga nagsugod na subong nga adlaw ang mall campaign nga “BPLO On-The-Go” sa SM City, Ayala Malls Capitol Central kag Robinsons Place tubtob sa Nobyembre 20.
Samtang sa Nobyembre 23, 24 kag 25 naman naka-schedule sa Gaisano City, 888 Chinatown Premiere kag City Mall-Singcang.
Kag sa Nobyembre 26, 27 kag 30 naman sa City Mall-Mandalagan, Lopue’s Mandalagan kag Lopue’s-East.
Plano naman nga palawigon sang BPLO sang tatlo ka bulan ang pagproseso sang business permit bangud sa pandemic.
