Lantawon pa sang disaster council sang ciudad sang Bacolod kun pila ang kantidad nga sarang madonar sa mga lugar nga apektado sang Bagyo Ulysses sa Luzon.
Nahibaluan nga ang provincial government sang Negros Occidental ang magadonar sang 4 million pesos nga cash assistance sa mga probinsya sang Albay, Catanduanes, Cagayan kag Isabela.
Sa interview sang Bombo Radyo kay Executive Assistant to the Mayor Joemarie Vargas, magadepende kay Mayor Evelio Leonardia kun pila ang kantidad nga igadonar.
Bwas nga adlaw, magasapol ang disaster council suno kay Vargas kag mahimo nga ipatsekyar ni Leonardia kun pila ang available nga pondo.
Kinahanglan naman ang approval sang Sangguniang Panlungsod angot sa donasyon.
Suno kay Vargas, indi makalaom sang dako nga donasyon bangud depleted na ang pondo bangud sa COVID 19 response apang masarangan man ang isa ka milyon ka pesos.
Ang ciudad sang Bacolod ang may yara sang 150 milyones pesos nga calamity fund subong nga tuig.
