Nadakpan na ang isa sa duha ka mga suspetsado sa pagluthang patay sa hardinero sa isa ka private resort sa ciudad sang Talisay sang Nobyembre 15.
Suno kay P/Master Sgt. Michael Mc Dowell, chief investigator sang Talisay City Police Station, ang biktima ang ginkilala kay Rogelio Dugay, 69 anyos, residente sang Victorias City apang nagapuyo sa ginatrabahuan nga resort sa Talisay.
Magtiyo naman ang suspetsado sa pagpatay nga ginkilala kanday Cerelo Salapa alyas Gaming kag ang hinablos sini nga si Rogelio Batoliño, 37 anyos, single kag lunsay mga residente sa Sitio Mambucano, Barangay Cabatangan, Talisay City, Negros Occidental.
Nahibaluan nga mga kaupod sang biktima nga nagatrabaho sa resort ang mga suspetsado kag ang ginalantaw nga kabangdanan amo ang kahisa bangod sa mas maayo nga pagtrato sang amo sa biktima.
Gilayon nga ginpatigayon ang manhunt operation batok sa duha nga nagresulta sa pagkadakop kay Batoliño kag yara na karun sa kustodiya sang Talisay City Police Station, apang padayun naman nga ginapangita ang nakapalagyo nga tiyo.
Ginpasaka na sa Prosecutor’s Office ang kaso nga murder sa duha ka suspetsado sang Martes.
