Duha ang pilason sa pagbungguanay sang duha ka truck sa Purok Roadside, Barangay Alijis, Bacolod City kahapon sang hapon.
Suno kay P/Lt. Conrado Espino Jr, hepe sang Bacolod Police Station 7, ang Mitsubishi canter truck nga ginamaneho ni Roy Delos Santos, 51 anyos, married kag residente sang Purok Tuburan, Barangay Mansilingan, Bacolod City ang ginbungguan sang Mitsubishi Elf Truck nga ginamaneho ni Ben Absalom, 29 anyos, single kag residente sa Dumpsite, Murcia, Negros Occidental.
Nagabyahe si Absalom sa East to West nga direksyon sang mag-overtake sa nasundan nga salakyan kag naglapaw sa pihak nga lane apang nasugata sini ang ginamaneho nga van ni Delos Santos nga nagabyahe naman sa magkatuhay nga dereksyon.
Nakaangkon sang mga injury ang duha ka driver nga gilayon nga gindala sa ospital agud nga madapatan sang nagakaigo nga pagbulong.
Sa karun wala pa mahibaluan kun mag-aregluhanay ang duha ka partido ukon may magapasaka sang kaso.
