Nagapaidalom gihapon sa quarantine ang 11 ka mga responders sang ciudad sang Bacolod nga nagresponde sa pagbungguanay sang ambulansya sang South Bacolod General Hospital nga may karga nga COVID-19 patient kag van kun sa diin napatay ang driver sadtong Nobyembre 11 sa San Sebastian – Lacson Street, Bacolod City.
Sa interview sang Bombo Radyo kay Executive Assistant to the Mayor Jomarie Vargas, naturn-over na ang kaso sa Emergency Operations Center (EOC) bangud may covid patient.
Suno diri, nakaquarantine na ang apat nga katapo sang Emergency Medical Responders, apat nga responders sang Chamber kag tatlo nagikan sa Bureau of Fire and Protection (BFP).
Nagpareswab naman ang katapo sang Chamber apisar nga nagnegative na ang kalabanan sa ila.
Samtang padayon pa ang tracing sang EOC bangud madamo sang mga tawo nga nagpuron-puron sa lugar sang aksidente apang wala man sang may nagpalapit.
Ginpahayag man sini nga ang mga rescuers ang nakahanda kag nakasuksok sang Personal Protective Equipment (PPE) na sa tion nga magresponde.
Suno kay Vargas, ginatrato nila nga positibo ang tanan nila nga ginarespondehan.
Ginasiguro man nila nga mahawan ang mga ginarespondehan agud nga wala na sang masabad sa tion nga sila ang nagaresponde.
Sa pihak nga bahin magapadala naman ang syudad sang cash assistance sa mga nahalitan sang bagyo apang pagaestoryahan pa nila ang kantidad nga ihatag.
