23 ka mga barangay sa Bacolod City ang gindeklarar nga COVID free bangud wala ang mga ini sang may narekord nga kaso sa nagligad nga 14 ka adlaw.
Ini ang ginalakipan sang Barangay 24, 22, 11, 15, 25, 26, 38, 21, 37, 34, 41, 27, 36,19, 39, 9, 23, 4, 10, 31, 28, kag Barangay 7.
Nalakip nman sa mga candidates for COVID free barangays ang Barangay 8, 13, 2, 1, 18, 14 kag Punta Taytay.
Sa interview sang Bombo Radyo kay Dr. Chris Sorongon, Deputy for Medical Data Analysis and Assessment sang emergency operation center (EOC) sang Bacolod City, ini bangud sa pagpamuno sang mga punong barangay kag mga opisyales.
Suno kay Sorongon, dako ang impact sa mga pumuluyo kun ila makit-an ang mga opisyal nga nagalibot kag nagapanaway bangud mahuya ang mga ini ng magsunod sa mga health protocols.
Dako man ang bulig suno sa iya sang mga border patrol sa barangay bangud gina-usisa gid ang mga pangayaw kag kun kaisa nagarequire pa sang health certificate.
Nagaplano man ini nga magpatigayon sang meeting ukon workshop kag himuon nga speaker ang mga punong barangay nga nagpaambit sang ila mga ihibalo sa EOC agud mahatagan sang inspirasyon kag makatuon man ang mga pinuno sang iban nga barangay.
Padayon man ini nga nagapangabay sa mga pumuluyo nga magsunod sa health protocols agud masustiner ang pagnubo sang kaso sa ciudad kag made-escalate na sa modified general community quarantine.
Nagpang-abiso man ini sa mga ginikanan nga bantayan ang ila mga kabataan ilabi na sa ila mga ginakadtuan.
Nagpahanumdum man si Sorongon nga mangin responsable sa isa kag isa paagi sa pagtuman sang mga pagsulundan.
