Isa ka babayi ang ginaalegar nga gin-abduct takna alas-8:00 kagab-i sa 19th Lacson St., Bacolod City.
Sa interview sang Bombo News Team sa duha ka wala ginhingadlan nga mga witness, nakita nila ang pagkuha sa isa ka babayi nga ginabanta yara sa 20’s ang edad kag nagasuksok sang manubo nga shorts kag itom nga spaghetti strap nga bayo kag nagabitbit sang isa ka sling bag.
Suno sa mga ini, may nakasugilanon pa ang babayi sa cellphone kag ginpamangkot kun diin na sila kutob sang nagpalapit diri ang isa ka lalaki.
Nahibaluan nga ang lugar kun diin natabo ang pag-abduct ang ginaparkingan man sang pila ka mga salakyan bangod mga restaurant na ang tabok sini nga dalan.
Suno sa mga witness, nagasugilanon ang duha sang hinali nalang nga nagpalapit ang duha ka mga lalaki nga nagikan sa Toyota Avanza.
Ginkugos sang isa sa mga lalaki ang babayi kag ginsulod sa salakyan.
Samtang nagpalagyo naman ang kaupod sang babayi nga ginlagas naman sang isa pa apang wala ini malab-ot gani nagbalik nalang.
Suno sa isa ka witness, ginsinggitan pa sini ang mga suspetsado matapos nga mabatian ang pagsinggit sang babayi, apang wala na sila nagpalapit sa kahangawa nga may armas ang mga suspetsado.
Ginmanduan naman sini ang mga abyan nga kuhaon ang plate number sang salakyan kag ini naman ang nagdangop sa Bacolod Police Station 2.
Nagsunod naman gwa ang puti nga Innova nga ginapatihan sang witness nga kaupod sang suspetsado bangod nagdulog man ini sa nasambit nga bangga apang gilayon man nga nagliko sa masunod nga bangga.
Natumod naman sang mga abyan sini ang plaka sang Avanza nga ROX 5728.
Naglibot ang patrol car sang Police Station 2 apang ginapahayag nga wala ini nagpadulong sa ginluntaran sang alleged abduction.
