Gin-athag ni Bacolod City Vice Mayor El Cid Familiaran nga wala sang specific nga features sang face shield nga ginarequire ang city government sa pampubliko nga mga lugar sa ciudad.
Nahibaluan nga mandatory na ang pagsuksok sang mga residente sang syudad sang Bacolod sang face shield sa pampubliko nga lugar matapos nga nagpasar ang Sangguniang Panlungsod sang City Ordinance.
Sa interview sang Bombo Radyo Bacolod kay Familiaran, pinuno sang Local Inter-Agency Task Force, madugay na ginpatuman ang pagsuksok sang face shield santo mando sang National Inter-Agency Task Force (NIATF) apang ginlocalize ang paghimo sang ordinansa kasunod man sang mando sang national nga himuan sang local ordinance gani ginhimo sang SP ang ordinance #944 nga nagarequire sang mandatory nga paggamit sang face shields kag pag-obserbar sang social distancing sa pampubliko nga lugar.
Nagpanindugan man si Familiaran nga indi ini luyag ni Mayor Evelio “Bing” Leonardia bangud mando ini sang national government.
Suno pa diri, nagagwa sa clinical studies nga ang pagsuksok sang face shield magluwas sa facemask kag masami nga pag-obserbar sang social distancing ang may yara sang 95 porsyento nga indi malatnan sang virus.
Ginpahayag man ni Familiaran nga wala sang required nga face shield basta maproteksyunan ang mata OK na apang call naman sang mga malls kun magpatuman sila sang face shield nga matabunan ang bilog nga nawong.
Nagahingyo man ang syudad sang kooperasyon sang tanan agud nga mapaidalom na sa Modified Enhanced Community Quarantine (MGCQ) ang syudad sa Disyembre 1.
Samtang, natalana man nga himuan sang syudad sang ordinansa agud maliwat ang ginapatuman nga curfew hours agud nga makaobserbar sang holiday paagi sa simbang gabi santo man sa hingyo ni Bishop Patricio Buzon sang Archdiocese of Bacolod.
Sa pihak nga bahin, ginpahayag man ni Familiaran nga may yara sang 14 ka mga nagpositibo sa Covid-19 sa Espinos Village matapos nga magpositibo ang isa ka nurse kag nalatnan sini ang iya mga kaupod sa balay.
Suno pa diri nga kalabanan sa karun nga ginatapikan ang mga healthcare workers gani indi dapat magsalig kag iobserbar ang tanan nga mga health protocols apisar nga yara sa balay.
