Ginpasalig sang bag-o nga officer-in-charge sang Department of the Interior and Local Government (DILG)-Negros Occidental nga padayunon sini ang maayo nga hinimuan ni late Atty. Ferdinand Panes.
Madumduman nga nagtaliwan sadtong Oktubre 28 sa edad nga 60-anyos si Panes bangud sa pneumonia matapos ini ma-admit sa ospital sa Iloilo City sadtong Oktubre 13.
Sa exclusive interview sang Bombo Radyo Bacolod kay Roselyn Quintana, ginpahayag sini nga nag-courtesy call na siya kay Negros Occidental Governor Eugenio Jose �Bong� Lacson kun sa diin madamo sila sang ginhambalan.
Lakip na diri amo ang prayoridad karon nga programa sang DILG nga pagpadayon sang road clearing operation kag iban pa nga mga proyekto.
Suno kay Quintana, Nobyembre 16 sang ginpapanaog ang mando nagikan sa DILG central office nga siya ang magabulos sa nabakante nga pwesto sang nagtaliwan nga si Atty. Panes kag Nobyembre 18 ang una sini nga adlaw sa pag-duty.
Nahibaluan nga si Quintana ang tumandok gid sang Mandurriao, Iloilo City.
Antes ginbutang bilang OIC provincial director sang DILG-Negros Occidental, na-assign si Quintana sa Iloilo City, Guimaras kag sa Regional Office mismo sang ahensya.
