Ginakalipay sang officer-in-charge sang Department of the Interior and Local Government (DILG)-Negros Occidental nga wala pa sila sang may nabaton nga mga isyu ukon problema angot sa pagresume sang road clearing operation.
Nahibaluan nga santo sa Memorandum Circular No. 2020-2015 nga ginpagwa sang Department of the Interior and Local Government ginamanduan ang mga gobernador, alkalde, punong barangay kag pinuno sang Sangguniang Panlungsod nga padayunon ang road clearing operation nga una na nga naumpisahan apang nauntat bangud sa coronavirus pandemic.
Sa exclusive interview sang Bombo Radyo Bacolod kay Roselyn Quintana, ginpahayag sini nga posible nabaton na sang kada local government units (LGUs) nga iresume liwat ang amo nga programa gani nga wala sang nangin problema bangud nasugudan na ini sadto.
Ginkumpirmar naman sini nga kinahanglan sang mga barangay nga magpasa sang ila nga una nga report sa DILG provincial office sa Disyembre 10 bangud ila pa ini nga isumite sa regional level.
Ginpasiguro naman ni Quintana nga may yara sa maga field officers nga maga-monitor sang ginahimo nga road clearing operation sang kada barangay ukon banwa kag ciudad sa probinsya.
Posible naman suno sa iya nga magapatigayon gihapon sang cross-posting para sa validation kun compliant ukon indi compliant ang isa ka barangay ukon LGU.
Nagapangabay naman si Quintana sa provincial government kag sa mga barangay officials nga magkooperar kag magbinuligay lamang sa amo nga programa sang gobyerno.
Nagpasalig man ini nga yara lang ang DILG agud nga maghatag sang assistance kag mag-giya sa tanan sa pagpatuman sang road clearing operation 2.0.
