Ginpasalig sang chief statistical specialist sang Philippine Statistic Authority (PSA)-Negros Occidental nga masweldohan ang tanan nga mga enumerators sa ginpatigayon nga 2020 census of population and housing sang nagligad nga bulan sang Setyembre.
Nahibaluan nga may nagpadangat sang reklamo sa Bombo Radyo nga pila ka mga enumerators sa Bacolod City ang wala pa gid nakabaton sang sweldo.
Sa pagpakig-angot sang estasyon kay Luis Gonzales, chief statistical specialist sang PSA-Negros Occidental, ginpahayag sini nga nakadepende sa output nga mapasa sang enumerators ang ila nga sweldo.
Ginpaathag sini nga bangud napaidalom sa modified enhanced community quarantine (MECQ) ang Bacolod sang Setyembre, nadelay ang pagpatigayon sang census.
Suno kay Gonzales, may iban nga enumerators sa Bacolod nga subong lang nga Nobyembre nakapasa sang ila output.
Dugang pa sini nga kun indi makakuha sang clearance ang enumerator nagikan sa ila nga supervisor, indi maprocess ang ila nga sweldo.
Apang ginpasiguro ni Gonzales nga masweldohan ang tanan nga mga enumerators.
Suno sa iya, kun sin-o naka-una pasa sang output, amo man ang una nga makabaton sang sweldo.
