Nagpasalig ang alkalde sa ciudad sang Cadiz nga magahatag sang bulig-pinansyal ang city government sa mga himata sang isa ka nurse kag isa ka manunudlo nga naga-angkasanay sa motorsiklo kag lunsay ginbawian sang kabuhi matapos nga nalapakan sang truck nga may karga nga tubo sa Cadiz City, Negros Occidental kahapon sang hapon.
Sa interview sang Bombo Radyo Bacolod kay Cadiz City Mayor Salvador Escalante, ginpahayag sini nga ginakasubo gid sang ciudad ang pagtaliwan sang duha ka makabig nga mga frontliners.
Suno sa iya, magapalab-ot ini mismo sang iya kaugalingona nga bulig kag subong man ang city government para sa pamilya nanday John Paul Ladrillo, driver sang motorsiklo kag nurse sa Cadiz District Hospital kag angkas nga si John Eurich Depasupil nga isa ka manunudlo sa Vicente Patricio Memorial Elementary School sa Barangay Magsaysay, Cadiz City.
Suno sa alkalde, may mga ordinansa na sila sa ciudad agud malikawan ang mga traffic accident.
Gani, plano sini nga irevisit liwat ang amo nga mga ordinansa agud nga indi na maliwat pa ang natabo.
Nagapangabay man si Escalante sa Department of Public Works and Highways (DPWH) nga kaayuhon kag tapuson na ang pila ka mga road constructions nga tubtob subong wala pa natapos.
