Masobra P23,000 ang kabug-usan nga balor sang illegal nga druga nga nakumpiskar sa separado nga buybust operations nga ginpatigayon sang Bacolod Police Station 2 kag Bacolod Police Station 8 kahapon sa ciudad sang Bacolod.
Sa interview sang Bombo Radyo kay Police Captain Leo Estopa, commander sang Bacolod Police Station 2, una na nga napriso sang Marso 2019 ang suspetsado nga si Benjamin Agravante, 51 anyos, street level individual kag residente sang Brgy. 1, Bacolod City apang naka-avail sang plea bargaining agreement kag nakagwa sang Hunyo sini nga tuig.
Suno kay Estopa, nakabaton sila sang report nga nagbalik sa illegal nga buluhaton si Agravante rason kun ngaa ila ini liwat nga ginmonitor kag natigayon nga madakpan sa Purok Bulinao, Brgy. 2.
Nakuha sa iya paghinakop ang P500, isa ka improvised tooter kag anum ka heat sealed transparent plastic sachet sang suspected shabu nga may kabug-aton nga duha ka gramos kag ginabanta nagabalor sang masobra P13,000.
Samtang, P10,000 naman ang balor sang illegal nga druga nga nakumpiskar sa buybust operations sang Bacolod Police Station 8 sa Sitio Magsungay, Purok 4, Singcang Airport kahapon.
Suno kay Police Capt. Jun Ray Batadlan, bag-u lang nakagwa sa prisuhan ang suspetsado nga si Cedrick Beliacampa, residente sang nasambit nga lugar.
Suno kay Batadlan, apat ka tuig ini nga nagtinir sa prisuhan bangud man sa kaso may kaangtanan sa illegal nga druga apang nadismiss ini kag siya ang nakagwa.
Nakuha sa iya paghinakop ang 1.5 gramos sang suspected shabu, isa ka calibre .38 kag anum ka mga bala.
Sa karun nakahunong ang mga suspetsado sa Bacolod Police Station 2 kag Bacolod Police Station 8 kag natalana nga pasakaan sang kaso nga pagbayolar sa R.A. 9165 ukon Comprehensive Dangerous Drugs Act of 2002.
