Duha ang patay samtang duha man ang pilasoan matapos nakabunggo ang isa ka motorsiklo sa nakaparada nga truck sa national highway Sitio Kahilwayan, Barangay Gargato banwa sang Hinigaran, alas-6:00 kagab-i.
Ginkilala ang mga napatay nga sanday Janu Yunsal, 23-anyos kag Chrismichu David, 26-anyos nga sakay sa Rusi nga motorsiklo samtang ang mga pilason naman nga sakay sa Kawasaki nga motorsiklo amo sanday Johnester Guarin, 26-anyos kag Cleo David, 25-anyos kag SK chairman sang Barangay Palayog, Hinigaran.
Sa interview sang Bombo Radyo Bacolod kay P/Major John Ganzon, hepe sang Hinigaran Municipal Police Station, ginpahayag sini nga santo sa ila nga imbestigasyon, papuli na kuntani ang mga biktima matapos nga nagtambong sa birthday party sa Bago City.
Naka-parada naman sa higad sang dalan ang truck nga ginamaneho ni Jomar Esparagoza matapos naka-eksperyensya sang mechanical error.
Suno kay Ganzon, naka-hazard man ang truck kag may yara man sang warning device.
Apang posible suno sa hepe nga madasig ang pagdalagan sang Rusi nga motorsiklo rason nga naalang-alang ini kag nagsarurot sa likod sang truck kun sa diin nagtabog sanday Yunsal kag Chrismichu David kag nalapakan pa gid sila sang nagasunod nga Kawasaki nga motorsiklo.
Ginhingagaw pa dala ang mga ini sa Hinigaran Emergency Clinic apang gindeklarar nga dead on arrival sanday Yunsal kag Chrismichu David samtang padayon pa nga ginabulong sanday Guarin kag Cleo David.
Ginkumpirmar naman ni Ganzon nga nakagwa na sa prisuhan si Esparagoza bangud nga wala man ini sang sala kag posible bayolasyon lang angot sa illegal parking ang ginlapas sini.
