Ginkumpirmar sang utod sang isa sa mga biktima sang Maguindanao massacre nga wala pa sila sang may nabaton nga claim para sa civil damages.
Madumduman nga 11 ka tuig na ang nakaligad sang natabo ang Maguindanao massacre kun sa diin 58 tanan ang napatay lakip na ang 32 ka mga journalists.
Sa interview sang Bombo Radyo Bacolod kay Andrea Jayme, utod ni Atty. Concepcion Brizuela, isa sa mga biktima sa Maguindanao massacre, ginpahayag sini nga tubtob subong wala pa gid nakabaton sang claim para sa civil damages ang nabilin nga pamilya sang abogado.
Nahibaluan nga ang mga himata sang mga biktima ang sarang makabaton sang P350,000 tubtob P23.5 million sa idalom sang special court’s decision.
Suno kay Jayme, preska pa sa gihapon sa ila ang natabo.
Dugang pa sini nga malaka nalang nga nagapa-interview ang ila pamilya bangud man sa kahangawa.
Ginatugyan nalang nila ang tanan sa ila nga abogado.
Bilang kabahin naman sang pagdumdom kay Brizuela, nagpatigayon sila sang rest laying kag candle lighting sa Bacolod public plaza subong nga hapon.
