Ginkumpirmar sang isa ka Pinoy sa Ontario, Canada nga liwat nga ipaidalum sa lockdown ang probinsya bangud sa padayon nga pagsaka sang kaso sang COVID-19 ilabi na sa ciudad sang Toronto.
Sa interview sang Bombo Radyo kay Ferdinand Galila, ginpahayag sini nga epektibo ang lockdown sa Nobyembre 23, alas 12:01 sang kaagahon kag magadugay sa sulod sang 28 ka adlaw.
Suno kay Galila, ini ang gindesisyunan sang gobyerno bangud nanotisyaran sang Ministry of Health nga sa kada napulo ka RT-PCR test, duha diri ang positibo.
Suno sa iya, nagakahangawa ang ciudad nga basi maglapaw ang pasyente sa mga ospital kag indi na ang mga ini sarang ma-accomodate.
Suno diri, ini ang ikaduha na nga wave sang virus sa Canada bangud ang first wave ang nagtabo sang Abril tubtob Hunyo.
Sang bulan sang Hunyo tubtob Agosto, amat-amat nga ginbuksan ang ekonomiya gani halin sang Agosto tubtob sa karun, makit-an ang pagsaka sang kaso.
Suno sa OFW, isa sa mga rason kun ngaa nagsaka ang kaso amu ang pagbukas sang mga barber shops, massage parlors, restaurant, strippers club kag pagbalik sang night life sa ciudad.
Apisar sang lockdown, suno kay Galila, sarang gihapon nga makabakal sang mga basic necessities sa mga malls kag ginapahanugutan naman ang online delivery sa mga kalan-an.
