Malapit P14 million nga balor sang illegal nga druga ang nakumpiskar sa buybust operations nga ginpatigayon sang Philipine National Police Drug Enforcement Group Special Operations Unit (SOU) 4 kag 7 sa JR Torres Subdivision, Brgy. Singcang-Airport, Bacolod City kahapon sang gab-i.
Sa impormasyon nga nakuha sang Bombo Radyo, arestado ang maglive-in partner nga sanday Jun Mark Ibe, 28 anyos, Regine Arroz, 28 anyos, residente sang Bacolod City kag kabulig nga si Shiela Mhary Balarao, 34 anyos, residente sang Binalbagan.
Narekober ang 20 ka dalagko nga bulto sang suspected shabu nga ginabanta nagabug-at sang duha ka kilo kag may estimated value nga P13.6 million, isa ka digital weighing scale, calculator kag kwarta.
Ang nakumpiskar nga illegal nga druga ang nakasulod sa isa ka karton sang gatas kag mga biscuits.
Suno sa mga otoridad, ang nasambit nga box ang nagikan pa sa Marikina kag ginpadala lang diri sa Bacolod kun sa diin si Balarao ang nagkuha sang package.
Ang mga suspetsado ang yara sa karun sa kustodiya sang Bacolod Police Station 8 kag natalana nga pasakaan sang kaso nga pagbayolar sa R.A. 9165 ukon Comprehensive Dangerous Drugs Act of 2002.
