Ginabanta P150,000 ang balor sang damage nga natuga sang sunog nga nagluntad sa duha ka residential-commercial buildings sa Galo St., Barangay 20, Bacolod City kahapon sang aga.
Sa interview sang Bombo Radyo kay Bacolod City Fire Marshal Fire Chief Insp. Publio “Buboy” Ploteña, ginpahayag sini nga alas-9:24 kahapon sang aga sang nagsugod ang kalayo sa naibabaw nga bahin sang isa sa mga building kun sa diin may naga-renta diri nga mga persona tubtob nga naglapta ini sa pihak nga building.
Suno kay Ploteña, gilayon ini nga nafire out alas 9:46 sang aga.
Suno sa iya, ang tag-iya sang isa ka building amo sanday John Ike Distrito kag Antonio Akap samtang si Ernesto Gustilo naman ang nagapanag-iya sang isa pa gid ka building.
Suno diri, sa kwarto sang border nga si Junjun Arbismisa nagsugod ang kalayo bangud may isa ka appliance nga naglupok ukon nashort circuit apang subject pa ini for laboratory examination.
Wala naman sang may nasamaran ukon napilasan bangud gilayon nga nakagwa ang mga borders.
