Nagapasalamat ang Philippine National Police kag Armed Forces of the Philippines sa paglakip sa ila bilang isa sa mga priority nga sektor nga gintumod ni Presidente Rodrigo Duterte nga mahatagan sang coronavirus disease 2019 (COVID-19) vaccine kun mangin available na ini sa pungsod.
Nahibaluan nga mangin prayoridad nga mahatagan sang bakuna amo ang mga pigado, vulnerable, kapulisan, militar subong man ang makabig nga mga frontliners.
Sa interview sang Bombo Radyo Bacolod kay P/Lt. Col. Ariel Pico, ginpahayag sini nga tuman gid ang ila pagpasalamat nga nakita sang presidente ang effort sang PNP agud mabatuan ang coronavirus.
Suno kay Pico, dapat tanan nga frontline workers lakip na ang media ang mangin prayoridad man sa bakuna.
Nagpangabay man ang tagpamaba sa kapulisan nga dapat handa sila nga magsuporta sa ano man nga direktiba sang gobyerno.
Samtang, nagapasalamat man si Army Major Cenon Pancito III, spokesperson sang 3rd Infantry Division sang Philippine Army sa pagkilala sang national government sa ila.
Suno sa iya, ila gid ginakalipay ang pagtulok sang gobyerno sa ila nga hinimuan ilabi na subong nga may yara sang pandemya.
Dugang pa ni Pancito nga kinahanglanon gid nila ang bakuna bangud sa nature kag risgo sang ila nga trabaho.
Nagpahanumdom man ini sa mga suldado nga magpabilin bilang tampad kag mapinasalamaton sa gobyerno bangud apisar madamo sila sang obra kag obligasyon, wala man sila ginapabay-an.
