Naghimo sang isa ka donation drive ang Bacolod City Government agud mag-facilitate sang donasyon nagikan sa private sector para sa mga naapektuhan sang bagyo sa Isabela, Cagayan kag Tuguegarao.
Sa interview sang Bombo Radyo Bacolod kay Atty. Maphilindo Polvora, City Assessor kag chairman sang Food Committee sang Bayanihan Center, ginpahayag sini nga magluwas sa P2 million nga financial assistance sang ciudad, maga-organize sila sang donation drive paraa sa private sector donations.
Suno kay Polvora, sa mga luyag magdonar sang in kind, pwede gid ini madrop-off sa Bayanihan Center halin Lunes tubtob Martes, alas-8:00 sa aga tubtob alas-5:00 sa hapon.
Samtang, ginkumpirmar naman ni Task Force Kasanag national commander John Chiong nga nagpadala man sila sang bulig para sa mga typhoon victims.
Lakip sa mga napadal-an na nila sang mga used clothes, pagkaon kag iban pa amo ang Legazpi City, Batangas, Bulacan kag Marikina.
Ang cash naman nga ila nalikom ang ila gina-convert sa pagkaon kag ginadistribute sa mga tuman nga nahalitan sa Luzon.
Nagapasalamat ini sa bulig sang mga members kag officers sang Task Force Kasanag nagikan sa US chapter.
