Kumbinsido ang station commander sang Bacolod City Police Station 2 nga wala sang abduction nga natabo sa 19th Lacson Street sang Huwebes sang gab-i.
Madumduman nga isa ka babayi ang ginaalegar nga gin-abduct takna alas-8:00 sang gab-i sa 19th Lacson St., santo sa panuaron sang mga lalaki nga nakakita sa insidente.
Sa interview sang Bombo Radyo Bacolod kay Police Captain Leo Estopa, wala sang kamatuoran ang ginaalegar nga abduction bangud wala man sang pamilya nga nagpablotter kag wala man sang tawo nga nagpalapit sa ila agud maghatag sang impormasyon nga may gin-abduct sadto, magluwas lamang sa tawag nga nabaton nila.
Suno pa diri, bisan ang Anti-Kidnapping Group sang PNP ang nagpahayag nga indi matuod kag alegasyon lang ang abduction bangud kun matuod ini, may pamilya na nga nagpangita sa babayi.
Ginverify man nila sa Land Transportation Office (LTO) ang plate number nga ginhatag sang mga lalaki nga ROX 5728 nga nainterview man sang Bombo News Team sang natabo ang gina-alegar nga kidnapping ang wala man naga-appear sa record.
Nagpanugyan na lamang ini nga antes magpati sa mga nakita sa social media kag ishare, iverify anay agud nga indi makatuga sang kahangawa sa publiko.
