Pabor ang isa ka food delivery rider sa ciudad sang Bacolod nga ipaidalom ini surveillance testing para sa COVID-19 sa Bacolod Bays Center sa Sabado, Nobyembre 28.
Sa interview sang Bombo Radyo Bacolod kay Maymar Durable, 29-anyos sang Barangay 28 kag isa ka food delivery rider sang Foodpanda, ginpahayag sini nga nagapasugot siya nga ipaidalom sa swab test bangud para man ini sa ikaayo sang tanan lakip na ang mga customer kag pamilya sini apang dapat nga may yara sang ayuda nagikan sa gobyerno.
Paathag ni Durable nga pananglitan magapositibo siya, ma-quarantine gid ini sa sulod sang 14 ka adlaw tubtob nga magnegatibo.
Ginpalibugan sini amo nga sin-o ang magasustento sa iya nga pamilya.
Nagalaom siya nga may yara sang bulig nagikan sa city government para sa pamilya sang magpositibo.
Samtang, ginpasalig naman ni Pacita Tero, pinuno sang Department of Social Services and Development (DSSD) nga tinguhaan nila nga mahatagan sang financial assistance ang pamilya sang mga magpositibo nga low income earners.
Suno sa iya, pananglitan nga may yara na sang supplemental budget, posible nga maka-accomodate sila para sa ayuda sang pamilya sang nagpositibo.
Sa karon suno kay Tero, food packs lamang ang mapangako nila nga mahataga para sa pamilya sang riders nga posible magpositibo.
