Nagpahanumdom ang tagpamaba sang Bacolod City Police Office sa publiko nga sumugod sa Lunes, Nobyembre 30, mangin istrikto na sila sa pagpanakop sa wala nagasuksok sang face shield sa pampubliko nga lugar sa Bacolod.
Sa interview sang Bombo Radyo Bacolod kau P/Lt. Col. Ariel Pico, ginpahayag sini nga hugot nila nga ipatuman ang city ordinance No. 944 sugod sa masunod nga semana kun sa diin ang kapulisan mismo ang magapanguna kag magabulig man ang task force disiplina sang ciudad.
Suno kay Pico, dapat tandaan nga sa paggwa sa panimalay, makabig na ini nga public place gani indi pwede pagkalimtan ang pagsuksok sang facemask kag face shield.
Nahibaluan nga may yara sang multa nga P200 sa mga taga-Bacolod nga madakpan nga wala nagasuksok sang face shield samtang P300 naman sa mga taga-out-of-town.
Pananglitan nga indi ini masettle sa sulod sang 48 oras, pwede nga maka-community service sang walo ka oras sa ila mismo nga barangay ang residente sang Bacolod samtang ang mga taga-out-of-town naman ang magapaninlo sa barangay kun sa diin ini nadakpan.
Kun indi naman makabayad ukon maka-community service suno kay Pico, sarang nga mapasakaan sang kaso nga disobience in person in authority ang nagbayolar sang ordinansa.
Panugyan ni Pico sa publiko nga magsunod na lang sa mga pagsulundan bangud para man ini sa ikaayo sang tanan.
