Ginkompirmar sang alkalde sang Bacolod nga magahatag sang ligwa ang syudad sa pagpatigayon sang simbang gabi nga magaumpisa sa Disyembre 16 sang kaagahon.
Sa interview sang Bombo Radyo kay Mayor Evelio “ Bing” Leonardia, mahatag sila sang ligwa para sa simbang gabi kadungan sang pagselebrar sang pagkatawo ni Ginoong Hesukristo apang kinahanglan sa gihapon nga magsunod sa ginapatuman nga health protocols agud malikawan ang liwat nga pagdamo sang kaso sang COVID-19 sa syudad sang Bacolod.
Madumduman nga nagsulat si Bishop Patricio Buzon sang Diocese of Bacolod sa city government agud hingyuon nga panubuan ang oras sang curfew nga sa baylo nga alas 10:00 sang gab-i tubtob alas 04:00 sang kaagahon, himuon ini nga alas-10:00 sang gab-i tubtob 3:00 sang kaagahon bangud ang simbang gabi ang ginabanta nga maumpisa alas 03:30 sang kaagahon kag alas 05:00 sang kaagahon.
Sa karun, ginahulat pa sang syudad ang pamat-od sang national inter-agency task force angot sa pagsulundan sa patigayunon nga simbang gabi.
Samtang, pahanugutan naman ang mga manugbaligya sa tion sang simbang gabi apang kinahanglan nila nga magsunod sa pagsulundan sang syudad nga may 100 meters nga balaligyaan sa atubang sang simbahan ilabi na ang mga displaced workers.
Nagpanugyan ang alkalde nga masami nga maghalong kag sundon ang health protocols agud malikawan nga matapikan sang balatian.
