Ginreport sang Emergency Operations Center-Task Force (EOC-TF) nga 31 na nagikan sa 61 ka mga kabarangayan sa syudad sang Bacolod ang “COVID-free” sa sulod sang 14 ka adlaw.
Ang mga barangay nga natumod nga “COVID- free” amo ang Barangay 2, 4, 6, 7, 8, 9, 10, 11, 13, 14, kag 15.
Wala naman sang narekord nga COVID cases sa Barangays 18, 19, 20, 21, 22, 23, 24, 25, 26, kag 27.
Duha naman ka semana nga wala sang mga residente nga nagpositibo sa virus sa Barangays 28, 31, 33, 34, 36, 37, 38, 41, Sum-ag, kag Punta Taytay, santo sa data nga ginpakita sang Bacolod EOC-TF.
Suno kay EOC-TF executive director City Administrator Em Ang, dako nga pagbag-o bangud sang tinalikdan nga bulan, 79 percent sang mga barangay ang nagapabilin nga may aktibo nga kaso apang sa karun nagdangat nalang sa 49 percent.
Nagalaom man si Ang nga magapadayon nga mangin dalayon ang pagnubo sang aktibo nga kaso sa syudad kag ginapaabot man nila nga madamo pa nga mga barangay ang mangin COVID free.
Madumduman nga sang Nobyembre 3, ang EOC ang nagreport nga 28 ka mga barangay sa Bacolod ang ginakonsiderar nga Covid free sa sulod sang duha ka semana.
Sa pihak nga bahin, nagpadala naman liwat ang syudad sang Bacolod sang sulat sa National Inter-Agency Task Force (NIATF) agud nga mapanubuan ang community quarantine sa status sang syudad bangud elligible naman agud magpaidalom sa Modified General Community (MGCQ) ang syudad matapos nga naganubo na ang kaso.
Suno kay Bacolod City Mayor Evelio Leonardia, may yara naman sila sang adavnce nga mensahe nga magapabilin sa General Community Quarantine ang syudad apisar nga eligible na ini santo sa mga data nga ginpresentar.
Nagalaom man ang alkalde nga magbag-o pa ang pamat-od sang National Inter-Agency Task Force (NIATF).
