Ginkumpirmar sang price monitoring officer sang Department of Trade and Industry(DTI)-Negros Occidental nga nagacomply gid ang mga manufacturers sa hingyo sang ahensya nga indi pagbag-uhon ang ila nga suggested retail price (SRP) para sa noche buena products.
Madumduman nga nagpagwa sang damlag lang sang guidelines ang DTI nga wala dapat sang pagbag-o sa SRP.
Sa interview sang Bombo Radyo Bacolod kay Reginald Hudierez, ginpahayag sini nga sa duha nila ka bulan nga price monitoring humalin sang Oktubre, nakita nila nga nagasunod gid ang mga manufacturers sa guidelines bangud wala nagsaka ang mga prevailing prices kun ipaanggid sa SRPs.
Ginpasiguro man sini nga wala sang pagbag-o sa SRP sang noche buena products subong nga tuig kun ikumparar sang nagligad nga 2019.
Nahibaluan nga ang noche buena products ang ginalakipan sang ham, fruit cocktail, cheese, sandwich spread, mayonnaise, keso de bola, spaghetti, macaroni, spaghetti sauce, tomato sauce kag creamer.
Gina-engganyo man ni Hudierez ang mga konsumidor nga ireport sa ila nga hotline no. 0917-626-3406 ang overpricing nga nagakatabo sa pila ka mga establisyemento.
Pananglitan nga indi magsunod sa SRPs sang mga noche buena utems subong man sang basic and prime commodities ang mga balaligyaan, posible sini nga kasuhan sang profiteering.
