Dakop ang menor de edad sa buybust operation sang Bacolod City Police Station 2 sa Purok Cagaycay, Barangay 2, Bacolod City kahapon.
Sa interview sang Bombo Radyo Bacolod kay Police Captain Leo Estopa, station commander sang Station 2, mga isa ka semana na nila ginasurveillance ang 16 anyos matapos nga nakabaton sang impormasyon nga madata ang illegal nga druga sa nasambit nga lugar.
Nakuha sa paghinakop sini ang 12 ka heat sealed transparent sachet of suspected shabu nga nagabug-at sang kapin 3 grams kag may market value nga P20,400.
Ginpahayag man ni Estopa nga madamo na sila sang mga menor de edad nga nagkaladakpan sa ila mga nauna nga operasyon bangud nagapati ang mga durugista nga ang mga menor de edad ang indi mapriso.
Apang sa karun ginapatigayon man nila ang monitoring kag imbestigasyon agud nga matumod kun sin-o ang nagasugo sa mga menor de edad.
Yara sa karun sa paghinakop sang Bacolod City Police Station 2 ang arestado apang natalana nga iturn over sa Social Development Center (SDC) kag ipaidalom sa medical examination.
