Dako ang pagpasalamat sang station commander sang Bacolod City Police Station 8 matapos nga nag-isa ang mga personnel nga iya nasakupan agud nga buligan ang isa ka personnel man nga nasunugan sadtong Nobyembre 24, 2020 sa Barangay 20, Bacolod City kag wala sang nasalbar nga gamit.
Sa interview sang Bombo Radyo Bacolod kay Police Captain Jun Ray Batadlan, sang nahibaluan nila nga wala sang nasalbar nga gamit kag natupok ang balay ni Police Staff Sergeant Gil Marie Ortega, ginpasalamatan na lamang nila nga wala man sang malain nga natabo sa pamilya sini.
Ginsapol sini ang iya mga tinawo kag natimingan man nga nag-abot ang COVID-19 Hazard Pay nga nagikan sa syudad sang Bacolod kag wala man nila ginlauman nga magaabot gani nagdesisyon sila nga ihatag na lamang ini kay Ortega.
Kabug-usan nga P22,000 cash ang nahatag nila sa kaupod.
Ginpasalamatan man ni Batadlan nga wala nagpangduha-duha sa pagbulig ang mga personnel sa ila man nga upod nga naapektuhan sang sunog apisar nga may kaugalingon man nga galastuhan sa tagsa ka pamilya kag nagapati sila nga mas maayo nga nagahatag sangsa ginahatagan.
