Wala na sang kabuhi sang masapwan nga naga-utaw utaw ang isa ka 18-anyos sa Bago River sa Purok San Pedro, Brgy. Napoles, Bago City sang Nobyembre 30.
Sa interview sang Bombo Radyo kay Police Master Sergeant Celso Omega, Deputy Chief of Police sang Bago City, nagbisita ang biktima nga si Rey Besin, 18 anyos kag residente sang Hacienda Casal-agan Dako, Brgy. DSB sa iya himata nga si Marilyn Rosapa sa Brgy. Napoles, Bago City sang naghagaday sila sang iya mga abyan nga sanday Rufino Besin kag John Driel Tesing nga magpangisda sa Bago River.
Suno kay Omega, ila nadesisyunan nga magpaligo sa suba kag samtang nagapaligo ang mga ini, wala nag-ekspektar ang biktima nga madalom ang bahin sang suba kag hinali na lang nga nagsaruroy.
Suno diri, gintestingan pa sang iya mga abyan nga luwason si Besin apang wala na ini nahingagaw.
Nagrespondi man ang Bago City Rescue Team kag nagpatigayon sang rescue operations agud makit-an ang biktima kag alas 12:30 sang hapon sang ila marecover ang bangkay sini sa tunga sang suba.
Ginhingagaw pa ini dala sa ospital apang gindeklarar na nga dead on arrival.
Suno sa deputy chief of police, natalana nga ipaidalum sa post mortem examination ang bangkay sang biktima.
