Nagpagwa sang executive order ang alkalde sang Valencia, Negros Oriental nga nagapaidalum sa banwa sa duha ka semana nga total lockdown halin Disyembre 2 tubtob 16, 2020 bangud sa nagataas nga kaso sang coronavirus disease.
Sa idalum sang EO nga ginpagwa ni Mayor Edgar Teves, wala ginapahanugutan ang mga indi residente sang Valencia nga magsulod sa banwa magluwas lang sa mga essential travel.
Igareactivate man ang mga checkpoints kag pagahatagan sang pass ang mga residente nga magasulod nga ila man iuli sa checkpoint kun magwa.
Pagasiraduhan ang Sibaan kag Paunay Market subong man ang mga resorts, tourist spots, ambulant vendors kag barangay assemblies.
Magabukas lang ang Valencia Public Market kag mga business establishments humalin alas 6:00 sang aga tubtob alas 6:00 sang gab-i.
Ang tanan nga opisina sa Valencia municipal government ang igapaidalum naman sa skeletal force system.
Ginadumilian man ang pag-inom sang alcohol sa pampubliko nga lugar.
