Nagpaathag ang commander sang Cauayan Incident Management Team sa nagviral nga litrato sang mga locally stranded individuals (LSIs) nga sakay sa boom truck kag wala naga-obserbar sang social distancing.
Sa interview sang Bombo Radyo Bacolod kay Emmanuel Jabasa, ginpahayag sini nga gingamit lamang ang boom truck agud magsugat sang mga LSIs nagikan mismo sa Tabuelan port bangud nga indi makaigo ang mga ini kun ang bag-o nga bus ang gamiton bangud may yara pa sila sang kagamitan nga ikarga.
Suno sa iya, pag-abot sa Escalante port, gilayon nga ginpapanaog ang mga LSIs kag ginsaylo sa bag-o nga bus sang banwa samtang ang mga gamit ang yara sa boom truck.
May naka-impon naman sa ila nga salakyan nagikan sa Tabuelan port patabok sa Escalante port nga 10 ka mga LSIs halin sa iban nga mga local government units (LGUs).
Suno kay Jabasa, gindiretso dala sa quarantine facility sang banwa ang masobra 50 ka mga LSIs nga taga-Cauayan kag karon nagapaidalom sa 14-day mandatory quarantine.
