Patay ang construction worker matapos nga ginluthang sa Barangay Cabatangan, Talisay City kahapon sang hapon.
Ginkilala ang biktima kay Julieto Rosalem, 57-anyos kag residente sang Barangay Payao sa banwa sang Binalbagan.
Sa interview sang Bombo Radyo Bacolod kay P/Cpl. Aljon Bautista, imbestigador sang Talisay City Police Station, ginpahayag sini nga humalin palang kahapon sang aga nagainom na ang biktima kag nag-untat lamang ini sang udto kag natulugan.
Pagkabugtaw niya sang hapon, nagkaon anay si Rosalem kag mga alas-5:30 sang hapon sang nagpadayon ini sa pag-inom.
Hinali nalang nga nag-abot ang duha ka mga suspetsado kag nag-inom-inom man.
Pagkaligad sang 15 tubtob 20 minutos, sa wala mahibaluan nga rason, gulpi nalang nga ginluthang sang mga ini ang biktima.
Suno sa mga nakasaksi, nagtulukay lamang ang mga ini kag wala sang komprontasyon nga natabo.
Duha ka lupok ang nabatian sang mga pumuluyo sa lugar.
Nakaangkon sang igo sa ulo si Rosalem nga gintunaan sang iya kamatayon.
Gilayon naman nga nagpalagyo ang mga suspetsado kun sa diin ang isa sa mga ini ang ginkilala sang tag-iya sang ilimnan nga si Andy Andrade kag residente sang Sitio Ikalayo, Murcia.
Suno kay Bautista, ila nga pagalantawon ang background ni Andrade.
Sa karon nagapadayon pa ang hot pursuit operation sang mga kapulisan batok sa mga suspetsado.
