Bangud sa pagreklamo nga ginagutom kag nahidlaw na sa pamilya ang rason kun ngaa ginpatay sang New People’s Army (NPA) ang narecover nga kalabira sa Barangay Riverside, Isabela, Negros Occidental.
Madumduman nga kasunod sang pagsungka sang mga miyembro sang New People’s Army (NPA) sa mga suldado sa southern Negros, ila man gintudlo sa mga otoridad ang ginlubngan sang anay kaupod sa hublag.
Sa interview sang Bombo Radyo Bacolod kay Ka Rey, NPA surrenderer, ginpahayag sini nga sa Barangay La Libertad ginpatay si Randy Garsola, 34 anyos, single, lalaki kag residente sang Purok Malibog, Sitio Mahupaho, Barangay San Agustin, Isabela apang sa Barangay Riverside ginlubong sadtong 2018.
Suno kay Ka Rey, ginsintensyahan nga patyon sang NPA si Garsola bangud nga nagareklamo na ini nga ginagutom kag nahidlaw sa pamilya.
Nahibaluan nga kaupod nila sa pagkutkut sang kalabira ang katapo sang 62nd IB, Scene of the Crime Operatives, barangay officials sang Barangay Riverside kag ang gina-aligar nga amay sang bangkay nga ginkilala kay Winy Garsola.
Nadala naman sa Nalagon Funeral Homes kag ginkuhaan naman sang SOCO sang standard DNA sample ang bangkay agud makompirmar kun matuod nga anak ini ni Winy Garsola.
