Ginkumpirmar ni Disaster Risk Reduction Management Head kag Executive Assistant Joemarie Vargas nga kapin 15 ka mga panimalay kag siyam ka mga pamilya ang naapektuhan sang pag-ulan sa Barangay Mansilingan, Bacolod City kahapon sang udto.
Sa interview sang Bombo Radyo kay Vargas, ginpahayag sini nga siyam ka mga pamilya ang gin-evacuate kag ginbutang sa isa ka eskwelahan kahapon sang udto bangud sa pagtaas sang baha apang sang magtahaw ang tubig, ila naman ini ginpabalik.
Suno sa iya, wala naman sang may namissing ukon nasamaran kag nagapasalamat ini nga wala sang may nagluntad nga flash floods.
Ginhatagan man sini sang pagtamod ang madasig nga pagsaka sang tubig sa Purok Carvic, Brgy, Mandalagan matapos ang ginabanta duha ka oras nga pag-ulan kagab-i kag ginpahayag nga yara sa idalum sang jurisdiction sang Department of Public Works and Highways (DPWH) ang mga lugar nga yara sa national highway.
Suno sa iya, antes sila magrespondi, ginapabalo anay nila ang natungdan nga ahensya.
Gindugang man sini nga may yara sila sang mga kagamitan nga ginagamit sa pagsuyop kag nagalaom nga ila lang buligan sang ahensya ang pagrespondi sa Lacson Street bangud ini ang masami nga ginabaha.
Suno sa executive assistant, apisar nga naghupa na ang ulan, kinahanglan gihapon nga solbaron ang drainage sa Purok Carvic gani ila tinguhaan nga macontact ang DPWH bangud handa man sila nga magbulig.
