Nagapasalamat ang Bacolod City Police Office (BCPO) sa pamilya Bantug sa pagdonar sang 500 sq. meters nga duta sa Barangay Granada agud nga patindugan sang pinakauna nga 3-storey standard building para sa Police Station 5.
Sa interview sang Bombo Radyo Bacolod kay P/Lt. Col. Ariel Pico, tagpamaba sang BCPO, ginpatigayon sang Lunes ang signing of Memorandum of Agreement (MOA) sa tunga sang BCPO kag pamilya Bantug.
Suno kay Pico, very strategic gid ang area bangud nga sa highway lang ini kag tuman gid ka accessible.
Nahibaluan nga ang building ang pagapondohan sang national government sa idalom sang Department of the Interior and Local Government (DILG) paagi sa PNP standardization program.
Suno sa tagpamaba, ini ang labing una nga tion nga may yara sang ipatukod nga standard building sang PNP sa Bacolod.
Nagalaom ini nga maka-groundbreaking na sini nga bulan ukon sa una nga binulan sang 2021 agud makasugod na dayon sang construction.
Ginkumpirmar man ni Pico nga may yara man sang idonar nga duta nga patukuran sang police station para sa Police Station 5 kag Police Station 9.
Ginaproseso naman karon ang para sa Police Station 10 kag Police Station 8.
Samtang, ila naman ginaproblemahan ang Police Station 3 bangud nga surudlon gid kaayo ang nahamtangan sang ila estasyon.
