Ginkompirmar ni Executive Assistant to the Mayor Ernie Pineda nga amo man ang pinuno sang extraction team sang Emergency Operations Center (EOC) nga nadala na sa quarantine facility sang ciudad ang mga food delivery riders kag mga pulis nga nagpositibo sa COVID test kadungan sang surveillance testing sang weekend.
Sa Interview sang Bombo Radyo Bacolod kay Pineda, ginalakipan sang duha ka food delivery service riders kag duha ka mga police ang nagpositibo sa Covid-19 nagikan sa 544 nga nagpaidalom sa surveillance testing.
Ginseal off naman ang tagsa ka balay sang mga nagpositibo santo sa nakaandan nga ginaubra sang mga barangay officials sa tion nga may mabaton sila nga mensahe nga may nagpositibo nga residente sa tagsa nila ka barangay.
Aminado man si Pineda nga may yara pa sila sang ginapaabot nga mapaidalom pa sa surveillance testing sa palaabuton nga Sabado kag Domingo bangud may pila pa nga wala nagkooperar nga mga food delivery riders.
Masobra naman sa 50 percent sang mga riders ang nagpaidalom sa test.
Suno kay Pineda, unahon nila paidalom sa surveillance testing ang kutob sa nakaschedule na kaangay sang Bacolod Traffic Authority Office employees, jeepney drivers, kag pila ka mga policemen kag tun-an pa nila ang mga masunod nga sector nga ipaidalom sa surveillance testing.
Nagpanugyan man ini nga sundon ang health protocols kaangay sang pagsuksok sang facemask, faceshield kag social distancing.
Kasubong ang maghalong bangud wala pa sang vaccine para sa COVID-19 kag ang virus yara lamang sa palibot.
