Gin-athag sang hepe sang Talisay City Police Station nga wala naga-engaged sa iligal nga druga sa ciudad sang Talisay ang isa ka barangay kagawad nga nadakpan sa buybust operation nga ginpatigayon sang Philippine Drug Enforcement Agency (PDEA) Region 6 sa Buri Road, Brgy. Mandalagan, Bacolod City kahapon sang hapon.
Sa interview sang Bombo Radyo Bacolod kay P/Major Jigger Gimeno, ginpahayag sini nga wala nagapatigayon sang illegal drug activity ang isa sa mga subject sa operasyon nga si Michael Astorga, isa ka Brgy. Kagawad sa Brgy Zone 12-A, Talisay City kag bata sang anay konsehal sa ciudad.
Suno kay Gimeno, posible nga wala ini naga-engaged sa iligal nga buluhaton sa Talisay bangud nahadlok ini nga maguba ang ila pangalan bilang kabahin sang political clan.
Suno kay Gimeno, kun involved si Astorga sa illegal drug trade sa Talisay, dapat madugay na nila ini nga namonitor kag madugay na nga naglupok ang iya pangalan.
Madumduman nga nakuhaan si Astorga upod ang isa pa ka subject person nga si Dino Dimson kag kaupod nila nga si Cris Angelo Abelarde sang 15 tanan ka mga medium heat sealed plastic sachet sang suspected shabu; isa ka big pack knot tied transparent plastic sachet sang suspected shabu; kag napulo ka mga small heat sealed plastic sachet sang suspected shabu nga ginabanta nagabug-at sang 150 grams kag nagabalor sang masobra P1 million.
Magluwas diri, nakuhaan man ang mga suspetsado sang P14,000 nga buybust money, isa ka weighing scale, mga cellphone kag improvised tooter.
