Nagapadayun ang pagtsekyar sang Task Force Botagoy sa mga produkto nga karne sa mga supermarket kag merkado sa ciudad sang Bacolod agud nga maseguro nga wala sang expired nga mabaligya.
Suno kay Executive Assistant to the Mayor Ernie Pineda, ginalantaw nila ang mga nagabaligya kag ila nga mga freezer.
Sa ila nga pagtsekyar, nakakuha ang mga ini sang expired nga mga produkto nga karne sa Libertad Market kag Mansilingan.
Pasalig ni Pineda, wala nagapahuway ang Task Force Botagoy sa pagmonitor agud nga masiguro nga wala sang magapangita sang paagi nga makabaligya sang expired nga produkto.
Kabahin man sa ginasiguro sang mga ini nga nag-agi sa slaughterhouse ang mga produkto nga karne.
Suno kay Pineda, pareho ang pagbantay nila sa COVID-19 kag sa ginabaligya nga karne sa ciudad.
Panugyan sang executive assistant nga dapat mangin mabinantayon ang mga kunsumidor, ilabi na nga malapit na ang Christmas season.
Kalakip sa dapat nga siguraduhon amo ang timbre ukon tatak, kag meat inspection certificate agud nga maseguro nga naglabay sa slaughter house ang mga karne.
Paathag ni Pineda nga ang may kategorya nga “A” ang sarang nga mabaligya sa lokal, ang “AA” ang mabaligya sa national samtang ang “AAA” nga kategorya ang sarang nga ma-export sa international market.
Suno diri, ang mga nakaagi sa slaughterhouse ang ginatsekyar antes kag matapos ihawon agud nga masiguro nga wala ini sang masakit kag maayo nga kaunon.
