Ginkumpirmar sang pinuno sang Bacolod City General Services Office (GSO) nga opisyal na nga ginsiraduhan ang Burgos Public Cemetery sang nagligad nga Disyembre 1.
Sa interview sang Bombo Radyo Bacolod kay Jerome Solinap, GSO head sa Bacolod, ginpahayag sini nga tuman na gid ka gutok sa amo nga sementeryo gani ila ginrekomendar upod ang City Health Office kay Bacolod City Mayor Evelio “Bing” Leonardia nga ipasirado ang patyo.
Bangud diri suno kay Solinap, indi na pwede makabaton sang bag-o nga burial ukon indi na pwede malubngan ang Burgos Public Cemetery.
Dugang pa ni Solinap nga nagaplano sila karon nga magtukod sang colombarium para sa mga patay nga lima ka tuig pasaka na nga nakalubong.
Paagi sini, igabutang ang mga kalabira sa bone box kag ihamtang sa colombarium agud nga liwat naman nga maka-akomodar sang burial ang amo nga patyo.
Samtang, hatagan naman nila sang tiempo ang mga pamilya nga naga-istar sa sulod mismo sang patyo agud nga maghalin sa lugar apang indi na ini dapat maglab-ot pa sa Enero.
Ginkumpirmar man ni Solinap nga indi kwalipikado sa Bacolod Housing Authority para maka-avail sang balay sa relocation site ang mga pamilya nga naga-istar sa sulod sang patyo bangud nga indi ‘for habitat’ ang sementeryo.
