Bangud sa kahulugbon, patay ang 23-anyos nga laborer sa banwa sang Ilog matapos ginlampusan sang bato sang makapila ka beses sang iya kaupod sa ilimnan sa Sitio Mahayag, Brgy. Dancalan sang Disyembre 6.
Sa impormasyon nga nakuha sang Bombo Radyo, nag-inom-inom ang suspetsado nga si Genesis Villaruz, 27 anyos kag biktima nga si Vincente Flores, 23 anyos, lunsay mga residente sang nasambit nga lugar, sang nagdesisyon ang duha nga magbakal liwat sang whiskey.
Samtang nagalakat sila padulong sa tindahan, hinali lang nga nagkuha sang bato si Villaruz kag ginlampus ini sa ulo ni Flores sang makapila ka beses.
Ginhingagaw pa dala sa ospital ang biktima apang gindeklarar nga dead on arrival.
Yara naman sa kustodiya sang Ilog Municipal Police Station ang suspetsado para sa nagakaigo nga disposition.
