Ginakalipay sang tagpamaba sang 3rd Infantry Division sang Philippine Army ang nangin pahayag ni Presidente Rodrigo Duterte nga wala na sang matabo nga ceasefire para sa New People’s Army (NPA) tubtob matapos ang iya termino.
Madumduman nga sang damlag lang, nagpagwa sang statement ang militar nga indi sila magrekomendar sa presidente sang tradisyunal nga holiday ceasefire sini nga Christmas season bangud nga indi man nila makita ang sinseridad sang makawala nga grupo.
Sa interview sang Bombo Radyo Bacolod kay Army Major Cenon Pancito III, spokesperson sang 3rd ID sang Philippine Army, ginpahayag sini nga ila gid ginakalipay nga ginpamatian gid ni Duterte ang sintemyento nila nga mga militar.
Suno kay Pancito, matig-a ang ila panindugan nga indi na magpatigayon sang ceasefire sa makawala nga grupo bisan holiday man ukon indi bangud suno sa iya, ginagamit lamang ini nga kahigayunan sang NPA agud magpang-extort sa mga komunidad kag magpang-recruit sang ila mga miyembro.
Madumduman nga sa weekly public address ni Duterte kagab-i, ginpahayag sini nga indi na indi magpatuman sang ceasefire sa iya nga termino bilang Presidente sa bisan anu pa nga intensyon ukon rasun.
Ginreject man sang Presidente ang posibilidad sa pagbalik sang peace talks sa tunga sang gobyerno kag National Democtratic Front (NDF), ang nagabuhat sang negosasyon para sa Communist Party of the Philippines (CPP).
