Ginatun-an na karon sang City Legal Office ang rekomendasyon sang Emergency Operations Center nga indi na pag-ipaidalom sa swab test kag quarantine ang mga magapauli nga Locally Stranded Individuals kun may yara na sila sang negatibo nga RT-PCR result gikan sa lugar nga ila ginhalinan.
Sa interview sang Bombo Radyo Bacolod kay Councilor Renecito Novero, chairman sang quarantine center action team sang ciudad, ginpahayag sini nga nagadihon na karon sang terms and conditions ang CLO kag kun ma-finalize na, ila ini dayon nga ipasa kay Mayor Evelio “Bing” Leonardia agud iya nga maaprubahan kag mangin isa ka Executive Order.
Ginpaathag man ni Novero ang pila ka mga qualifications agud maka-avail sang amo nga tikang ang mga LSI.
Suno sa konsehal, dapat may mapakita nga negative RT-PCR test result ang LSI nga wala nagalapaw sa tatlo ka adlaw antes ini nagbiya sa iya nga area of origin kag dapat nga wala ini sang sintomas nga ginamanifesto.
Kun ma-qualify, idiretso ini dayon sa barangay kag iga-endorso sa Barangay Health Emergency Response Team (BHERTs) kag papulion sa iya nga puluy-an.
Kinahanglan naman sini nga tumanon ang 14-day mandatory quarantine sa iya nga balay kag ang BHERT ang maga-monitor sa amo nga LSI.
Pananglitan nga magpakita sang ano man nga sintomas, gilayon nga pahibaluon sang BHERT ang EOC agud nga ma-extract ang LSI kag madala sa isolation facility.
Liwat naman nga gin-athag ni Novero nga rekomendasyon pa lamang ini kag mandatory sa gihapon sa karon ang swab test kag quarantine para sa mga naga-inabot nga LSI sa Bacolod.
