Ginkumpirmar sang chairman sang Action Team on Returning OFWs nga wala sang moratorium para sa mga returning overseas Filipino ang Bacolod City kag padayon ang flights kag sweeper flights sa bulan sang Disyembre.
Sa interview sang Bombo Radyo kay Councilor Israel Salanga, gin-athag sini nga wala sang airline nga nagpahibalo sa ila nga nag-untat ini sa pagbyahe kag nagapadayon ang schedule sang flights sang mga returning OFWs.
Suno kay Salanga, apisar nga ginpaidalum na sa modified general community quarantine (MGCQ) ang ciudad, wala sang pagbag-o sa protocols kag pareho lang gihapon ang proseso sang repatriation.
Suno diri, sa mga OFWs nga miyembro sang Overseas Workers Welfare Administration (OWWA), pag-abot sa Ninoy Aquino International Airport (NAIA), ginpaidalum ang mga ini sa swab test kag ginaquarantine tubtob nga magwa ang negatibo nga resulta.
Kun positibo ang result, pagadal-un ini sa quarantine facility sang Department of Health tubtob nga matapos ang 14 ka adlaw.
Samtang kun negatibo naman, suno sa konsehal, igaschedule ini gilayon sa sweeper flights kag pag-abot sa Bacolod-Silay Airport, sugaton ini sang local government unit, tsekyaron ang test results kag i-evaluate ang physical condition.
Suno diri, ang LGU man ang magadul-ong sa ROF sa ila puluy-an kag didto pagatapuson ang 14 days quarantine humalin sang nag-abot ini sa Pilipinas.
Sa karun, suno kay Salanga, may yara na sang kabug-usan nga 5,000 OFWs nga nakapauli sa ciudad humalin sang nagsugod ang COVID-19 pandemic.
